სპორტის დროა - საქართველოში გასამართი ყველა სპორტული ღონისძიება — ერთ პლატფორმაზე

არგენტინა მოქმედი ჩემპიონია და ტურნირზე 5-დან 5 მოგებით მოდის, თუმცა ბოლო ორი მატჩი დრამად ექცა — კაბო-ვერდესთან დამატებით დროში, ეგვიპტესთან კი 0:2-დან დაბრუნებით მოიგო. მესის მუნდიალებზე უკვე 21 გოლი აქვს და ისტორიის საუკეთესო ბომბარდირია; ამ ტურნირზე კი 8 გოლით მბაპესთან ერთად ლიდერობს. შვეიცარიამ ალჟირი დამატებით დროში დაამარცხა, კოლუმბია კი პენალტებში გამოთიშა.

შვეიცარია B ჯგუფიდან მეორე ადგილით გავიდა, 1/16 ფინალში კი ალჟირს დამატებით დროში 3:2 მოუგო. მათი ძალა ორგანიზებული დაცვაა — გრანიტ ჯაკა და დან ნდოიე გუნდის სტაბილურობას ქმნიან. კოლუმბია K ჯგუფის ლიდერი იყო და ჯგუფში გოლიც არ გაუშვია, წინა რაუნდში კი განა დაამარცხა. ხამეს როდრიგესი მოედანზე კვლავ დირიჟორობს, ლუის დიასი მარცხენა ფლანგიდან ამწვავებს, ჯონ დურანი კი საჯარიმოში საფრთხეა.

აშშ ტურნირის თანამასპინძელია და პლეი-ოფში დიდი ამბიციით მოდის — 1/16 ფინალში ბოსნია 2:0 დაამარცხა და ახლა უკვე ბელგიის გამოცდილებას ეჯახება. ბელგიამ წინა რაუნდში სენეგალი 3:2 დაამარცხა და კიდევ ერთხელ აჩვენა, რომ „ოქროს თაობის“ ბოლო ციკლს ბოლომდე ებღაუჭება. კევინ დე ბრუინესთვის ეს, დიდი ალბათობით, ბოლო მუნდიალია, ამიტომ ყოველი მატჩი ბოლო დიდი შანსის წონას ატარებს.

მექსიკამ ჯგუფური ეტაპი სრული 9 ქულით დაასრულა, 1/16 ფინალში კი ეკვადორი 2:0 დაამარცხა. ინგლისმა L ჯგუფი მოიგო და წინა რაუნდში კონგოს დრ 2:1 დაამარცხა — ჰარი კეინი 4 გოლით „ოქროს ბუცისთვის“ ბრძოლაში რჩება. 1986 წლის მუნდიალის მეოთხედფინალში, სწორედ „აცტეკაზე“, მარადონამ ინგლისს „ღმერთის ხელითა“ და „საუკუნის გოლით“ აჯობა. 40 წლის შემდეგ ინგლისი ამ მოედანზე ბრუნდება.